الثلاثاء، 8 يوليو 2008
ادمان بأرخص الأثمان ...و حلال !
هذا الموضوع حساس وايد....! و يمكن راح يسير طق و ذبحة و دم و حرب و صواريخ و يمكن بعد نسبة 99% راح يحقدون عليي ! انا ما ادري شنو راح يسير بعد ما اكتب هذا الموضوع و انشاءالله يمر هذا الموضوع على خير :P ............................................................................ اعتقد في المواضيع الي طافوا ذكرت وايد اشياء عن الناس الي مو ملك نفسهم بمعنى ... ان في ناس يقلدون و يهبون بالشي و اهم ما يعرفون شنو اضراره او يمكن حتى ما اتكون رغبه او حب او حاجته حق الشي نفسه او يمكن يسوي الشي و اهو ما يدري شنو قام يسوي و هذا تثبت نظريات كثيرة و منها نظرية الادمان الحلال و المدمنين بالكويت وايد ...وايد وايد واااااااااايد !! ادمان اكثر من المخدرات مدمنين القهوة ... نسبة الادمان بالكويت 99.999% هذه الايام نسمع وايد عن القهوه و عدم مفارقتها صارت القهوه شي اساسي بحياتنا .. و اهيه مو جذي صارت الكافيهات محطات الوقود الي اتعبي للناس القهوه وانتشار هذه الكفيهات بكل 10 متر معناته ان احنا محتاجينها القهوه اكثر من ماء انا اعتقد ان قبل سنة 2000 ماكان في الادمان بالقهوه و انتشار هذه الكافيهات بكثرة و بعد هذه السنه صارت القهوه مديل الكل قام يشربها و طبعا كل واحد صارعنده نوع خاص فيه من القهوه... مكتوب باسمه هذا النوع وانواع القهوه وايد فرنسية - عربية - تركية(قهوة نور) - سورية - لبنانية - امريكية - برازيلية - سودانية - شرقية - غربية آسوية قطب الجنوبية بحرية قمرية مريخية يبنشيلالمنتياسنلتبا يبرليسل... آخر نوع الكطفحلئيخية انا ما اعرف الا 3 انواع و الي لقيتهم عندي بالبيت...و الي اهم  اقدم لكم طبق المدمنين القهوه الفرنيسة اول وحده على اليمين و بودرتها ناعمة حييييل!! حق التنشع :P الوسطية القهوه العربية لازم اتكون دفاشة في اوراق شير صغار بعد :ٍS يعني نفس الحشيشة !! اتسويها زقارة و الاخيرة القهوة التركية هذه القهوه اتكون ثقيلة حيل !! هذه لازم ابرة!!!  الله عل مزاج ... !! تاخذ ابره على الريج و اتسير سوبر مان  لا تنسى تفريغ الهواء من الابرة...! هذه ايدي الجلحة!!!!!!!!!!!!!!!!!!!! يمكن فكرة ان القهوه تشبه المخدرات صارت واضحة اكثر لأن القهوه تحتوي على الكافيين والي يسبب هذا الادمان بحثت عن اضرار ارتفاع نسبة الكافيين و لقيت داخل هذا الموقع العجيب علامات ارتفاع نسبة الكافيين ظهور الأعراض التالية : · العصبية الزائدة و الهيجان و الصداع و صعوبة التركيز و النسيان. · زيادة في معدل ضربات القلب و الشعور بالخفقان. · القلق و الأرق و الإكتئاب و الإرهاق و الرعشة. · الإضطراب العام و اضطراب المعدة وحرقة الفؤاد . · عدم انتظام ضربات القلب و ارتفاع ضغط الدم. · ارتفاع مستوى الكلستيرول في الدم. · تبليل الفراش. انتوا ركزوا على آخر وحده !!!!!!!!! :) روووووح ... عيل شكلة نسبة 99.999% من الكويتيين امسوينها و اشلون يقولون ان القهوه اتهدي الاعصاب ؟؟ " ولد عمي خل ناخذ فنيان قهوه و انعدل المزاج " و ييلك واحد اتقول صج مدمن " ابي قهوه تكفا الله يخليك اخذ ساعتي اخذ ملابسي بس تكفا قطرة قهوه " و تلقاه يتحكك و يرجف شنوالناس قام يقصون على نفسهم ؟؟ و الحين الكافيهات صاير مديل و كل واحد عنده كافيه ما يروح غيره " والله انا ما احب ستاربوكس... احب ستار باااااكس " و ييلك واحد " انا ما احب غير ستار باكس مال العديلية " يعني الحين افرقت بين العديلية و المناطق الثانية !!! و يليك واحد صوته وصواصة " خو قلبي ... انا ما احب ستار باكس ... احب كوستا " و البنات !!!! كلهم مع بعض " احنا انحب ستار باكس مال الافينيوز...بنكنا الوطني" طبعا البنات وين الزحمة و وين الاماكن اليديدة و الغالية يروحون و الحين فاتحين منتديات حق الي يشربون قهوه بس ...!!! يعني شنو يبون يناقشون فيه عن القهوه .. بس اشرب قهوه و خلاص يعني تبي اتنقاش بأي اييد تبي تشرب القهوه ولا الفنجان عود او صغير!!! ولد عمي نكي عاشق القهوه ... انتوا عبالكم انا اجذب لمن اقول عاشق و عاشق و عاشق ؟؟؟ دشوا اهني و شوفوا http://www.bdr130.net/vb/t120169.html لا يضيق خلقكم يا جماعة تره كلها قهوه و هذا كله مجرد راي و مو اكثر طبعا بعد هذا الموضوع ما ادري شنو راح يسير فيني و من باب الاحتياط الواحد يكتب وصيته :p |
الأحد، 15 يونيو 2008
خسرانين بس المهم انشوف ... !
ماكو تذاكر و ماكو مكان وين نقعد ...!! خسرانين فايزين نبي انشوف المباراة غصب طيب هذا الي صار في استاد نادي الكويت في مباراة الكويت و الامارات انا و ربعي رحنا المباراة متأخرين حدنا !! و سبب مستر قاسم رفيجي !! و ماتوقعنا الحضور ...!! مشاءالله على قولة الشباب ... طق عصي ولد عمي و ما لك مكان و هذا يوضح لكم مدى فخامة افضل استاد بالكويت حتى الآن ........................................................... و اول ما دشينا نادي الكويت شفنا معلم من معالم الكويت من عجائب الدنيا الثمان !! لأنه توه ضايفنة على عجائب الدنيا السبع ملاحظة : اذا تبي اتطالع الصورة عدل ... طق عليها كلك و راح تطلعلك الصورة واضحة و اذا الصور ما كانوا واضحين هذا بسبب الجو اللندني العجيب !  هذا برج نادي الكويت ... :q و هذا تراث الصراحة اتشوفون الشباب صاعدين علشان يطالعون المباراة بس مكانه حلو حده يم مشجعين منتخب الكويتي و الملعب كله يبين واضح !!! احسن من انه تشتري تذاكر و ما اتطالع شي  اهني معطيهم زووم ...  رووووح الف لك مكان...  دكة الاحتياط ....  اوووووووب.... ! عدل عدل طق الطوفة بدال ما تشتري تذكرة و المساكين عبالهم انا من جريدة  قاعدين على طرف المدرج حده حده ... يعني اذا واحد تمغط الثاني يطيح ما تسوى  هذيله الي يغيرون النتيجة :p المشكلة ما يبين الملعب عدل من هالمكان روحوا طالعوها بالبيت احسن لكم  شوفوا الزحمة اللي بالمدرجات .. تره واقفين يطالعون المباراة من اهني !!  عدل توم كروز .. في فلم مهمة المستحيلة !! وين تبي اتروح يعني ... تره يبي يشقح الطوفة !! و المشكلة في شرطي واقف يم الطوفة بالجهة الثانية  قوات الخاصة بعد تسجيلهم الهدف الاول :P  فرحة الجماهير عند تسجيل الهدف الاول يا فرحة ما تمت ... صورة عجبتني و حطيتها :P ............................ طبعا الصور الي شفتوها دليل على انه الرياضة الكويتية متأخرة و راح تتأخر اكثر ... عيل احسن استاد بالكويت يكفي 25 الف مقعد ! اي 25 الف داخل النادي و 25 الف بره النادي و زحمة السيارات واصلة لي مبنى كونا و كوزمو و الشرطة امسكرين الشوارع .... و ناس واقفين بره النادي حق شنو ما ادري و استاد جابر ليلحن ما خلص كاتبين تاريخ الأنتهاء من البناء : 2006 احنا في 2008 متى عيل الافتتاح .. ناطرين رونالدينهو ؟؟ رونالدينهو اعتزل و انتوا ما بطلتوا النادي ...! صراحة الي ماسكين الرياضة بالكويت شكلهم ما يعرفون شي عن الرياضة ما يعرفون كرة القدم يسمونها طمباخية هذيلة حده مقصي و درباحة او تعطون حق جواد القبقب اهو الي يمسك الرياضة بالكويت على الاقل يطلعلنا مشجعين محترفين :p |
الأحد، 8 يونيو 2008
نور يغزو الكويت و بدون صدام؟؟
هذا نور عرفته من اهلي بعد تعذيب دام اسبوعين !!! قصتي قصة حزينة ... اشلون تعذبت و انا اعرف هذا نور !!؟ الله يسلمكم كنت توني بطلع من بيتنا جان اسمع الوالده اتقول : لالا نور نور الحين ...! انا بيني و بين نفسي : نور ؟ عبالي خدامتنا القديمة طنشت و طلعت بعد ما رديت من لعب كره و خسران و تعبان و مالي خلق شي دشيت البيت و قعد بالصالة ولا الاهل كلهم قاعدين يتعشون ... و انا بس اسمع نور نور نور نور نور نور نور نووووور !!! من التلفزيون نور نور نور .... من التكييف نور نور نور ...التلفون يرن نوررر نوررررررررررر انا عبالي قام يسولفون عن واحد مرشح روحه حق الانتخابات قلت خل اصعد فوق احسن لي ...مالي خلق سوالف الانتخابات و انا صاعد الدري و على طقات ريلي اسمع نور نور نور نور مع كل طقه نور نور نور نور نور نور نور !!! اليوم الثاني تيمعنا ببيت خالي .. ولا كل الاهل قاعدين يسولفون عن نور ! سوالف الاهل اييييييي شفتي نور ....يهبل هبولي اي اي بس الجلب ما باسها !! لالا بس دعاية بامبرز كانت وايد حلوة ! عندج نغمة نور ؟؟ اي سمعي ..... لالالالالا انا ما ابي الموسيقى بس ابي الاغنية الكاملة الي محد غناها !! ........................................... و انا اقول شنو هالمرشح الي عنده رنات بعد !!! هذا شكلة راح يدش المجلس و اهو امغمض عينه و قعد اسبوعين على هالحال آخر شي طلع الحبيب مسلسل تركي مدبلج حق سوري و ينحط على قناة سعودية !!!!! شسالفة :@ .... المسلسل اسمه نور و نور طلعت بنت مو ولد  هذه نور على اليمين و يمها بطل المسلسل مهند ...اللللللللللله اسمه حلو انا بعرف الكويتيين ليش دقة سلف !! ليش كل ما تطلع مسلسلات مثل المسلسلات المكسيكية و الاسبانية يقعدون يتكلمون و يهبون هبه مو طبيعية يسوون نفس تسريحة شعرهم و يلبسون نفسهم و يغيرون اساميهم....! الحين تطلعلك بقالة اسمها نور ... و صالون نور ... و قهوة نور خدمة نور من زين... مياه نور النقية ... قرض نور من بنك التمويل ! منتدى نور ... NoorQ8 ... عاشق نور .... al7a banota noor وين رايح ؟ والله رايح شارع نور ... مسرحية نور و الاقزام السبعة ... نوووووووور أقصد يماااااااااااااااااا خلالالالالالالالالالالالالاص !!! كل شي صار اسمه نور !!! .............. صارت سالفة صغيرة مع صاحبي .... ضايف بنات بالمسنجر و كل ما يسأل وحده شنو اسمج اتقول اسمي نور ... الللللللللللللللللللللللللله صار موديل الحين نور يعني الحين الي يبي يضبط وحده يروح يقولها انا اسمي مهند ... الله اسمك حلو ابي رقمك المهم انا ما انتقد الشي الا لمن اكون متأكد منه علشان ما اظلمه ... طالعت جم حلقة من المسلسل و علشان اواكب الشعب الكويتي ... قلت حق اهلي يقولونلي القصة ... القصة و ما فيها اهيه 4 مصطلحات !! رد لها - انفصل عنها - زاوج - طلاق ... اخترص هذه المصطلحات في كلمة واحدة نور اي والله شنو اكو بالمسلسل غير الزواج و الطلاق حبها كرها حبته كرهته لي متى طلاق و زواج !!!! خلاص غيروا !!! هذه اشياء كلها متكررة في مسلسلاتنا الجميلة الكويتية الي راح اكتب عنهم بعدين!!! و اطب فيهم عدل ! شوفوا برزون بريك او لوست ! طالعو شي يديد ! شغلوا مخكم مع هذه المسلسلات العالمية الى اتوقفكم على حيلكم !! اتشدكم عدل !! فيها ذكاء و شي عمركم ما راح اتفكرون فيه او اتشوفونه |
الأحد، 1 يونيو 2008
اسمحولي يابلدية الكويت .. مو على الكويتيين !!!
الجمعة، 23 مايو 2008
هذا الي يبونه من حقوق المرأة ...!
اي هذا الي يبونه من حقوق المرأة ... الحريم بعد ما عطوهم حقوقهم كل وحده شاده حيلها و تبي تثبت انه المرأه الكويتية موجوده .. و منو قال لأ ! اثبتي وجودك عند ريلج و عيالج الا بالمجلس !! شنو تبين اتسوين يعني ؟؟؟ تبين تحرقين مستشفيات ثانية ؟ ولا اتطيحين التعليم بالقاع اذا الرياييل ما اقدروا ؟!!! الحريم شنو يبون يسوون ؟؟؟ المهم اهم الي يبونه من حقوق المرأه هذا !!!!!!!!!  بالله عليكم هذيله كفو مجلس اشخلوا حق الشباب والمراهقين ! طبعاً هذا الهدف من حقوق المرأة يبون وناسه بالمجلس و يبون تغير لمن تقعد بالمجلس ما اتشوف واحد لحيته لي ركبه ... او واحد شنبه جنهم خيوط لابجين و كله ريالييل رياييل ...ملل ها ؟ نظرية الشعر الي بالويه ما يبونها ..الجماعة يبون تغيير!!! يبون فرفشه بالمجلس ... يبون امثال اسيل العوضي ... يبون الleggiens طبعاً هذه النظرية غلط بالنسبه لكم ....! اشلون يفكرون جذي في حقوق المرأة و شكو يبون حريم بالمجلس علشان يخززون فيهم و يبون فرفشه بالمجلس ...وو وو وو انا كنت اقول نفس الكلام ...بــس! لمن بطلت الجريدة ابي اعرف نتايج المجلس مالقيت احد بس قام اشوف هذه الاصور!!  طبعا المنظر عجييب و جميل و حضاري و يليق في المرأة الكويتية طبعاً الدوريات اهم الي امقزرينها على بو نظام !!!  هذا شاف جم وحده راح كلمهم على طول ... ممنوع تركبون السيارة اهو ماكو شي ممنوع بس اهو قاط ويهه..الزبده يبي يكلمهم  يالله هذه حقوق المرأة ... تعطيها حقوقها طالع شنو اتسوي... و المشكله المصورين اهم الي امقزرينها يقول انا بتاع جريدة الراي و طايح تصور ببناتنا و يعطي صورتين حق الجريدة و الباجي حقه و ربعه .. و البنات مستانين بعدين يما حاطيني بالجريدة .. و الام اي يا بنيتي خلج قوية المرأة الكويتية قوية تتعلق بالسيايير نفس رجل الاخضر  عدل عدل ...هذه المصخره الي يبونها !! تطبل و ترقص و يقولونلي ماكو شباب او شرطة بالصورة البنات بروحهم صح!! ماكو احد بالصوره بس ما ادري منو امصور هذه الصوره وحاطها بالقبس !!! يدتيييييييييي !!!؟؟؟  اي اي ردونا قري ...تبون المرأة اتدش المجلس بعد الهنود ما سوو هذه الحركة !!! و انا باطين جبدي المصورين...محد يكلهم مصور يعني مو ريال ؟؟؟ يدش و يصور الي يبي محد يكلمه ؟؟؟  محد كاسر خاطري غير هذه !!! يا ابن الكاميرا ... اهيا اتغطي ويها علشان لا اتصورها ! شكو امصورها و حاطها بالجريدة ..عناد يعني ؟؟؟ ولا كاتبين بالجريدة مواطنه متوجهه الآن للتصويت غصب غصب يبون يحطون الصوره في جريدة القبس ..!! القبسة  هذه آخر صورة علشان اتصدقون كل كلامي !! 1- شوفوا المصري الي متغلغصبين الحريم و الرحيم ولا كأنه ريال بينهم 2-شكلها قام اتصارخ و اتغني ..ما ادري منو طالع عاد ... لا اترجعين بس 3-قام يصورونه ..ما ادري منو عاد مايكل جاكسون 4- طبعا صاحبنا هاد الرياييل و طالع حق الحريم !! و طبعا مستانس صاحبنا حددددده ...مو هذا الي يبونه من المجلس يتيمعون عليهم الحريم ................................................. هذه الصور الي انا طالعتها بالجريدة ... المفروض يحطون اسماء الفائزين مو تارسينلي الجريدة كله صور حريم !!! انزين صوره وحده حق الشباب ...ماكو ! و هذا الي قام اقوله انا .. يبون حقوق المرأة علشان لمن اتبطل الجريدة الصبح اتطالع الويوه الحلوه و اتطالع الجنس الناعم على قولتهم تنفتح نفسيتك ...و لمن تطلع بالشارع اتطالع البنات يوزعون صور و ورد و لمن اتدش المجلس في الوان ثانية مو كله لون ابيض اي هذا الي يبونه من حقوق المرأة ... ما يبون المرأة كلها يبون البعض منها حقوق المرأة الصيدة! |
الأحد، 11 مايو 2008
I AM LEGGINS...!
 I AM LEGGIENS فلم جديد يتكلم عن الموديل اليديد الي يتكشخون و يفتخرون في البنات هذه الايام ...! الفلم بطولة بنات الكويت ( مو كلهم ) ... اخراج مارينا مول و باجي المجمعات ... قصة الفلم هي ان بنات السوق يحاولون يغيرون الشباب الطايشين بأي طريقة ... و الشباب زومبي وراهم طبعا احنا الحين موسم الاغراءات ... موسم الصيف ! و البنات في هذا الموسم يبدعون ... و حتى الشباب ... بس البنات اكثر :P طبعا هذا الموديل الي بالصوره اسمة leggins والي هابين فيه البنات هالايام .. يسير نفس الاسترج و يصك على الريل صك كله وحده قام تتمشى ولا بسه الleggins و ريولها جنه ريول دياية و و لابستلي كعب اطول من حنجها و تتمشى و جك جك جك جك اتقول قاعد في نادي الفروسية مو بمجمع ...و الزومبي وراها ولا تييلك وحده امتينه لابسه الleggins اووووه قمه بالاغراء الاسترج صاك على ريلها و اتشوف طبقات طبقات .... بس ناقص يكتبون همبرجر خزان ....عليها!! و تلبسلك كعب بس مو اي كعب كعب بو راس مطرقه .. لأنه الكعب العادي ما يشيلها ... وتتمشى دم دم دم دم طخ طخ و الثريات اتطيح و الجام يتكسر ... انا ما ادري اشلون صايرين هالبنات .... انتي لابسه هذا اللبس لج ؟ و لا للشباب ؟؟ و لا للاثنين ؟؟ ولا قام اتسوين دعاية مطعم ؟ و الشباب هابينلك في موديل بعد ... موديل لويست هذا الموديل السخيف و الشباب اسخف منه لانهم قام يلبسونه... طريقته انه ينزل البنطرون لي ركبه و يبين السروال الداخلي و بس هذا اهو الموديل الخباز .. مثل الي بالصورة ما ادري يعني ليش تبينا انطالع شنو لون سروالك .... و متكشخ ويدش المجمعات و يتمشى و امطلع سرواله الداخلي عليه قلوب حب ... يعني شوفوني انا من بره حب و من داخل حب ...!! ولد عمي انا كلي حب بحب بس قالوها عيال رميثية : باند سيا سفيد ناميشى ولو اني ما احب الامثال ................................................................................. i am leggins اسم الفلم ياي من i am legend مصدر الصورة rachel-b's مع اشوية اضافات من عندي .... |
الأربعاء، 7 مايو 2008
امرأة خبيثه .......!!!
 آآآآآآآخ .... صدق الشاعر و الحكيم ( مستر اعتراض ) لمن قال : وراء كل مصيبة عظيمة امرأه خبيثة....!!! يعني مصطلحات الخراب و الدمار و الخبث في هذه الصورة ........! انا اعتقد انه بداية النهاية للكويت على ايد هذه الامثال من الحريم هذه المرشحة الامورة طيبة ابراهيم مرشحه روحها علشان تعزل الدين عن الدولة !!!! يا عجوز الشمطاء المشكله امسوية تفخ بعد !!! انتي يايه على آخر عمرج تبي تعزلين الدين عن الدولة ... انت بعد يومين من الاتخابات اتموتين!!! يايه علشان الشباب يصوتونلج تبين تعزلين الدين..! اتعرفين يا خبيثه انه بعض الشباب يبونها خاربه ..و يبونها فري !! بعض الشباب ؟؟؟ اذا مو بعض الشياب و العيايز امثالج...! و امتعبه روحها و طالعتلي في قناة الوطن ام الفتن و اتنقاش روحها ... المذيعه المسكينه مو قادره تتكلم في مرشحين يبون يتكلمون الساحره ماخذه الجو حقها و المشكلة قام اتدافع و اتحاول علشان بس تعزل الدين عن الدولة ...!! هذا الهدف الاول من المجلس ولا الهدف ثاني : اتقول تبي اتساوي بين الريال و المرأه في الميراث ... يعني نصيبه الريال من الورث نفس المرأه!!! ملاحظة : ( الريال يعني الرجل .. مو يدشون ناس من السعودية وش ذا ... وش علامك مع الريال السعودي ) اشفيها رونالدينهو .. اهدافها عجيبه..! انتي بكيفج اتساوين بين الريال و المرأه... انت يايه تلعبين في شرع الله(استغفرالله) ...والله معطينها ويه وايد...!!! بس الشره مو علينا .......... هذه المرأه الكويتية الي اذبحونا فيها .... كل وحده داشتلي علشان هدف سخيف و كل يوم طالعتلي وحده المرأه الكويتية و المرأه الكويتية ... المرأه الكويتية شنو تبي اتسوي ما غير اتخرب و اتعفس الديره .. ولا وحده سوت لنا شي ... الي امطيحه التعليم بالارض.. الدول الثانية ما يعترفون في جامعه الكويت لأنه تعليمنا وايد وايد احسن من تعليمهم....!! و الثانية احرقتلي مستشفى و انسحبت على طوووووول ... لول انا حطيتها قاعده يا جماعة ... ولازم اتحطونها في راسكم عدل كل مصيبه و كل خراب وراه مرأه ... وراجع التاريخ !!! وراء كل مصيبه , امرأة لا ترضى الا بمشكلة عظيمة و بعد جم يوم من الانتخابات لازم انطالب بازالة دواوين جاي الظحه ... مثل ما شالو دواوينا خل يشيلون دواوينهم ! انا ما احب اتكلم وايد حلو الكلام يكون اشوية... و اخاف اقول شي زياده ...يطب صاروخ بالغلط فوق بيتنا (بالغلط ) |
